ashk palkon pe jab bhi aata hai

ashk palkoñ pe jab bhī aatā hai

aks āñkhoñ meñ thartharātā hai

gher letā hai mujh ko sannāTā

jab bhī sūraj utar ke jaatā hai

kis ne pūchhā ham aise muflis ko

kaun hai jo hameñ bulātā hai

faḳhr se ham jo Dālte haiñ nazar

aa.ina ham pe muskurātā hai

ham to kahte haiñ is ko pāgalpan

ret par ghar koī banātā hai

kal jo Tapkā thā merī āñkhoñ se

ve sitāroñ meñ jagmagātā hai

ḳhvāb bahne lage haiñ ashkoñ se

kaun sā ġham use rulātā hai

ruk jā kuchh der merī bāhoñ meñ

bāġh-e-jannat se kaun jaatā hai

ashk palkon pe jab bhi aata hai

aks aankhon mein thartharaata hai

gher leta hai mujh ko sannaTa

jab bhi suraj utar ke jata hai

kis ne puchha hum aise muflis ko

kaun hai jo hamein bulata hai

faKHr se hum jo Dalte hain nazar

aaina hum pe muskuraata hai

hum to kahte hain is ko pagalpan

ret par ghar koi banata hai

kal jo Tapka tha meri aankhon se

we sitaron mein jagmagata hai

KHwab bahne lage hain ashkon se

kaun sa gham use rulata hai

ruk ja kuchh der meri bahon mein

bagh-e-jannat se kaun jata hai