ashk par zor kuchh chala hi nahin

ashk par zor kuchh chalā hī nahīñ

maiñ ne rokā bahut rukā hī nahīñ

ātish zer-e-pā sabab varna

ḳhaak sahrā kī chhāntā hī nahīñ

yā to sab kā ḳhudā hī sachchā hai

yā to sachchā koī ḳhudā hī nahīñ

zehn kahtā hai sar jhukā le tū

dil magar hai ki māntā hī nahīñ

bāl-o-par hoñ qavī to kyā hāsil

jab uḌānoñ kā hausla hī nahīñ

haa.e maiñ ne pas-e-ġhalat-fahmī

vo sunā maiñ ne jo kahā hī nahīñ

maut kā Dar ise dikhā.eñ kyā

zinda rahnā jo chāhtā hī nahīñ

sirf ehsās-e-kamtarī hai tujhe

aur tū hai ki māntā hī nahīñ

maiñ hī maiñ bazm meñ rahā maujūd

aur maiñ bazm meñ gayā hī nahīñ

merī ġhībat meñ vo bhī haiñ shāmil

aaj tak jin se maiñ milā hī nahīñ

jo ki pahchān ho mirī 'āzam'

sher aisā koī huā hī nahīñ

ashk par zor kuchh chala hi nahin

main ne roka bahut ruka hi nahin

aatish zer-e-pa sabab warna

KHak sahra ki chhanta hi nahin

ya to sab ka KHuda hi sachcha hai

ya to sachcha koi KHuda hi nahin

zehn kahta hai sar jhuka le tu

dil magar hai ki manta hi nahin

baal-o-par hon qawi to kya hasil

jab uDanon ka hausla hi nahin

hae main ne pas-e-ghalat-fahmi

wo suna main ne jo kaha hi nahin

maut ka Dar ise dikhaen kya

zinda rahna jo chahta hi nahin

sirf ehsas-e-kamtari hai tujhe

aur tu hai ki manta hi nahin

main hi main bazm mein raha maujud

aur main bazm mein gaya hi nahin

meri ghibat mein wo bhi hain shamil

aaj tak jin se main mila hi nahin

jo ki pahchan ho meri 'azam'

sher aisa koi hua hi nahin