ashk pine pe rahe dard chhupane pe rahe

ashk piine pe rahe dard chhupāne pe rahe

ek sach bol ke kis kis ke nishāne pe rahe

umr-bhar husn tire naaz uThāne pe rahe

aab āñkhoñ meñ liye aag bujhāne pe rahe

tum parinde the ga.e aa.e ga.e phir aa.e

peḌ the ham to sadā ek Thikāne pe rahe

ham se chhoḌī na ga.ī arz-e-vatan kī miTTī

apne ajdād kī qabroñ ke bahāne pe rahe

muflisī bhuuk ye bachcha ye khilaune kī dukān

bojh itnā na kisī baap ke shāne pe rahe

aise mausam meñ tumheñ yaad bahut ā.ūñgā

jab havā surḳh gulāboñ ko jalāne pe rahe

jab bhī shab-ḳhūn qabīle pe adū ne maarā

jitne sardār the sab jaan bachāne pe rahe

mujh se har saañs pe māñgā gayā shiddat se ḳhirāj

mere ehsān idhar saare zamāne pe rahe

taaj ġhairoñ ne mire sar pe sajā.e 'bazmī'

mere apne mirī dastār girāne pe rahe

ashk pine pe rahe dard chhupane pe rahe

ek sach bol ke kis kis ke nishane pe rahe

umr-bhar husn tere naz uThane pe rahe

aab aankhon mein liye aag bujhane pe rahe

tum parinde the gae aae gae phir aae

peD the hum to sada ek Thikane pe rahe

hum se chhoDi na gai arz-e-watan ki miTTi

apne ajdad ki qabron ke bahane pe rahe

muflisi bhuk ye bachcha ye khilaune ki dukan

bojh itna na kisi bap ke shane pe rahe

aise mausam mein tumhein yaad bahut aaunga

jab hawa surKH gulabon ko jalane pe rahe

jab bhi shab-KHun qabile pe adu ne mara

jitne sardar the sab jaan bachane pe rahe

mujh se har sans pe manga gaya shiddat se KHiraj

mere ehsan idhar sare zamane pe rahe

taj ghairon ne mere sar pe sajae 'bazmi'

mere apne meri dastar girane pe rahe