اشک پینے پہ رہے درد چھپانے پہ رہے

اشک پینے پہ رہے درد چھپانے پہ رہے

ایک سچ بول کے کس کس کے نشانے پہ رہے

عمر بھر حسن ترے ناز اٹھانے پہ رہے

آب آنکھوں میں لئے آگ بجھانے پہ رہے

تم پرندے تھے گئے آئے گئے پھر آئے

پیڑ تھے ہم تو سدا ایک ٹھکانے پہ رہے

ہم سے چھوڑی نہ گئی ارض وطن کی مٹی

اپنے اجداد کی قبروں کے بہانے پہ رہے

مفلسی بھوک یہ بچہ یہ کھلونے کی دکان

بوجھ اتنا نہ کسی باپ کے شانے پہ رہے

ایسے موسم میں تمہیں یاد بہت آؤں گا

جب ہوا سرخ گلابوں کو جلانے پہ رہے

جب بھی شب خون قبیلے پہ عدو نے مارا

جتنے سردار تھے سب جان بچانے پہ رہے

مجھ سے ہر سانس پہ مانگا گیا شدت سے خراج

میرے احسان ادھر سارے زمانے پہ رہے

تاج غیروں نے مرے سر پہ سجائے بزمیؔ

میرے اپنے مری دستار گرانے پہ رہے