اشک رخسار کو دھوتا تو سخنور ہوتا

اشک رخسار کو دھوتا تو سخنور ہوتا

میں سلیقے سے جو روتا تو سخنور ہوتا

چشم حیرت میں بھی رقصاں تھی جھڑی اشکوں کی

اپنے دامن کو بھگوتا تو سخنور ہوتا

ڈوبتے شمس کے ہونٹوں سے ظفر ظاہر تھی

اس تبسم کو سنجوتا تو سخنور ہوتا

دشت تنہائی میں یہ انگلیاں کچھ دیر اپنی

خون دل میں جو ڈبوتا تو سخنور ہوتا

دیر تک چاندنی ساحل پہ تھی رقصاں افسوس

میں اسی جھیل پہ ہوتا تو سخنور ہوتا

میرے احساس نے سینے سے نچوڑا ہے عرق

اس میں لفظوں کو ڈبوتا تو سخنور ہوتا

وادیٔ حبس میں اکھڑی تھی فضا کی سانسیں

لفظ قرطاس پہ بوتا تو سخنور ہوتا

جاگنے والوں نے عالمؔ کو بدل ڈالا ہے

میں ذرا دیر نہ سوتا تو سخنور ہوتا