ashk ruKHsar ko dhota to suKHnawar hota

ashk ruḳhsār ko dhotā to suḳhnavar hotā

meñ salīqe se jo rotā to suḳhnavar hotā

chashm-e-hairat meñ bhī raqsāñ thī jhaḌī ashkoñ kī

apne dāman ko bhigotā to suḳhnavar hotā

Dūbte shams ke hoñToñ se zafar zāhir thī

is tabassum ko sañjotā to suḳhnavar hotā

dasht-e-tanhā.ī meñ ye uñgliyāñ kuchh der apnī

ḳhūn-e-dil meñ jo Dubotā to suḳhnavar hotā

der tak chāñdnī sāhil pe thī raqsāñ afsos

meñ isī jhiil pe hotā to suḳhnavar hotā

mere ehsās ne siine se nichoḌā hai araq

is meñ lafzoñ ko Dubotā to suḳhnavar hotā

vādī-e-habs meñ ukhḌī thī fazā kī sāñseñ

lafz qirtās pe botā to suḳhnavar hotā

jāgne vāloñ ne 'ālam' ko badal Daalā hai

meñ zarā der na sotā to suḳhnavar hotā

ashk ruKHsar ko dhota to suKHnawar hota

mein saliqe se jo rota to suKHnawar hota

chashm-e-hairat mein bhi raqsan thi jhaDi ashkon ki

apne daman ko bhigota to suKHnawar hota

Dubte shams ke honTon se zafar zahir thi

is tabassum ko sanjota to suKHnawar hota

dasht-e-tanhai mein ye ungliyan kuchh der apni

KHun-e-dil mein jo Dubota to suKHnawar hota

der tak chandni sahil pe thi raqsan afsos

mein isi jhil pe hota to suKHnawar hota

mere ehsas ne sine se nichoDa hai araq

is mein lafzon ko Dubota to suKHnawar hota

wadi-e-habs mein ukhDi thi faza ki sansen

lafz qirtas pe bota to suKHnawar hota

jagne walon ne 'alam' ko badal Dala hai

mein zara der na sota to suKHnawar hota