ashk tham gae honge dil sambhal gaya hoga

ashk tham ga.e hoñge dil sambhal gayā hogā

jaane kaun saa.at phir dam nikal gayā hogā

itnī aag to sāhab puurā ghar jalā degī

aañch dhīmī kar liije duudh ubal gayā hogā

maañg ujāḌne vaalo god kyā ujāḌoge

maañ ġharīb ho kar bhī la.al pal gayā hogā

ajnabī ḳhalāoñ meñ Daar se bichhaḌte hī

jaal bichh ga.e hoñge vaar chal gayā hogā

nā-murād rāhoñ par lauT kar bhī kyā aate

be-gharī ke māroñ kā ghar badal gayā hogā

maut ke añdhere meñ vaqt tham gayā hogā

raat bujh ga.ī hogī din bhī Dhal gayā hogā

bad-gumān hāthoñ meñ kis ne dī kamān āḳhir

ḳhud hī the nishāne par tiir chal gayā hogā

muztarib ḳhayālī meñ kab ḳhayāl rahtā hai

roTiyāñ pakāne meñ haath jal gayā hogā

ab ke shaam aa.ī hai jaane kin zamīnoñ par

kaun se jahānoñ meñ din nikal gayā hogā

ashk tham gae honge dil sambhal gaya hoga

jaane kaun saat phir dam nikal gaya hoga

itni aag to sahab pura ghar jala degi

aanch dhimi kar lije dudh ubal gaya hoga

mang ujaDne walo god kya ujaDoge

man gharib ho kar bhi lal pal gaya hoga

ajnabi KHalaon mein Dar se bichhaDte hi

jal bichh gae honge war chal gaya hoga

na-murad rahon par lauT kar bhi kya aate

be-ghari ke maron ka ghar badal gaya hoga

maut ke andhere mein waqt tham gaya hoga

raat bujh gai hogi din bhi Dhal gaya hoga

bad-guman hathon mein kis ne di kaman aaKHir

KHud hi the nishane par tir chal gaya hoga

muztarib KHayali mein kab KHayal rahta hai

roTiyan pakane mein hath jal gaya hoga

ab ke sham aai hai jaane kin zaminon par

kaun se jahanon mein din nikal gaya hoga