ashk umDen to unhen palkon pe roka jae

ashk umDeñ to unheñ palkoñ pe rokā jaa.e

kyoñ ye pindār-e-vafā sūrat-e-girya jaa.e

jab se dekhe haiñ tirī āñkhoñ ke sāgar ham ne

ik na.ī aarzū ubhrī hai ki Duubā jaa.e

maiñ samā.at meñ sameTe huuñ hazāroñ dushnām

zabt-e-ġham kā hai ye irshād na bolā jaa.e

ham ko is ḳhvāb-e-mohabbat se jagāyā kis ne

naqsh chehroñ pe adāvat kā na dekhā jaa.e

zaḳhm-ḳhurda na kahīñ uñgliyāñ vahshat ho jaa.eñ

barbat-e-dil ko kisī ke na yuuñ chheḌā jaa.e

dil hai maslūb-e-anā baam pe sūraj bhī nahīñ

kis tarah ghar ke añdheroñ ko ujālā jaa.e

paañv jab ḳhār-e-muġhīlāñ se haiñ chhalnī 'ābid'

kyoñ na phir ātish-e-namrūd meñ utrā jaa.e

ashk umDen to unhen palkon pe roka jae

kyon ye pindar-e-wafa surat-e-girya jae

jab se dekhe hain teri aankhon ke sagar hum ne

ek nai aarzu ubhri hai ki Duba jae

main samaat mein sameTe hun hazaron dushnam

zabt-e-gham ka hai ye irshad na bola jae

hum ko is KHwab-e-mohabbat se jagaya kis ne

naqsh chehron pe adawat ka na dekha jae

zaKHm-KHurda na kahin ungliyan wahshat ho jaen

barbat-e-dil ko kisi ke na yun chheDa jae

dil hai maslub-e-ana baam pe suraj bhi nahin

kis tarah ghar ke andheron ko ujala jae

panw jab KHar-e-mughilan se hain chhalni 'abid'

kyon na phir aatish-e-namrud mein utra jae