ashkon se dhul ke aaina-KHana badal gaya

ashkoñ se dhul ke ā.ina-ḳhāna badal gayā

bārish huī to mausam-e-rafta badal gayā

jab bhī sambhālā chāñd ne barbād shahr ko

dīvār-o-dar vahī rahe naqsha badal gayā

ik dasht-e-be-amāñ meñ safar kar rahe the ham

sāñseñ ukhaḌ ga.iiñ kabhī rasta badal gayā

utrī nazar se gard to manzar kuchh aur thā

yuuñ lag rahā thā jaise vo chehra badal gayā

har baar pahuñche ham tire me.aar tak magar

har baar terā ham se taqāzā badal gayā

pahle to intiqām ne shal kar diye havās

phir jaane kyā huā ki irāda badal gayā

is baar tere harf-e-tasallī na bin sake

is baar terī baat kā lahja badal gayā

kam kam rahā thā din ke samay dil meñ terā aks

shab aa ga.ī to jaise ye shīsha badal gayā

ashkon se dhul ke aaina-KHana badal gaya

barish hui to mausam-e-rafta badal gaya

jab bhi sambhaala chand ne barbaad shahr ko

diwar-o-dar wahi rahe naqsha badal gaya

ek dasht-e-be-aman mein safar kar rahe the hum

sansen ukhaD gain kabhi rasta badal gaya

utri nazar se gard to manzar kuchh aur tha

yun lag raha tha jaise wo chehra badal gaya

har bar pahunche hum tere mear tak magar

har bar tera hum se taqaza badal gaya

pahle to intiqam ne shal kar diye hawas

phir jaane kya hua ki irada badal gaya

is bar tere harf-e-tasalli na bin sake

is bar teri baat ka lahja badal gaya

kam kam raha tha din ke samay dil mein tera aks

shab aa gai to jaise ye shisha badal gaya