asir-e-ab-o-gil ko ek din aazad hona tha

asīr-e-āb-o-gil ko ek din āzād honā thā

na.ī duniyā meñ jaanā thā vahāñ ābād honā thā

mohabbat karne vaalo jā rahe ho ab kahāñ marne

jahāñ dil ko lagāyā thā vahīñ barbād honā thā

ḳhushī miltī kahāñ se jab ba-nām-e-gardish-e-daurāñ

use nāshād karnā thā mujhe nāshād honā thā

ye apnī ḳhush-nasībī thī ki ham pahle chale aa.e

sitam jo us ko Dhānā thā abhī ījād honā thā

'kañval' shahr-e-nigārāñ meñ thā itnā hosh kab dil ko

kahāñ rahnā thā bandish meñ kahāñ āzād honā thā

asir-e-ab-o-gil ko ek din aazad hona tha

nai duniya mein jaana tha wahan aabaad hona tha

mohabbat karne walo ja rahe ho ab kahan marne

jahan dil ko lagaya tha wahin barbaad hona tha

KHushi milti kahan se jab ba-nam-e-gardish-e-dauran

use nashad karna tha mujhe nashad hona tha

ye apni KHush-nasibi thi ki hum pahle chale aae

sitam jo us ko Dhana tha abhi ijad hona tha

'kanwal' shahr-e-nigaran mein tha itna hosh kab dil ko

kahan rahna tha bandish mein kahan aazad hona tha