asir-e-azmat-e-kirdar bhi nahin hue hain

asīr-e-azmat-e-kirdār bhī nahīñ hue haiñ

abhī to sāhab-e-dastār bhī nahīñ hue haiñ

ham ik tarah se giraftār to hue haiñ magar

kuchh is tarah se giraftār bhī nahīñ hue haiñ

hamesha lete haiñ ham ḳhud-aziyyatī kā maza

hamāre dard girāñ-bār bhī nahīñ hue haiñ

abhī se kis liye tum ko paḌī hai jaane kī

abhī to bañd ye bāzār bhī nahīñ hue haiñ

abhī ḳhayāl meñ ham ne kiyā hai ghar ta.amīr

abhī to is meñ giraftār bhī nahīñ hue haiñ

hazāroñ kaam hamāre liye haiñ kyoñ tayyār

abhī to niiñd se bedār bhī nahīñ hue haiñ

tamām log gharoñ meñ dubak ke jā baiTheñ

ye shahr itne pur-asrār bhī nahīñ hue haiñ

uTheñ aur us kī galī meñ kahīñ bhī jā baiTheñ

'hanīf' itne subuksār bhī nahīñ hue haiñ

asir-e-azmat-e-kirdar bhi nahin hue hain

abhi to sahab-e-dastar bhi nahin hue hain

hum ek tarah se giraftar to hue hain magar

kuchh is tarah se giraftar bhi nahin hue hain

hamesha lete hain hum KHud-aziyyati ka maza

hamare dard giran-bar bhi nahin hue hain

abhi se kis liye tum ko paDi hai jaane ki

abhi to band ye bazar bhi nahin hue hain

abhi KHayal mein hum ne kiya hai ghar tamir

abhi to is mein giraftar bhi nahin hue hain

hazaron kaam hamare liye hain kyon tayyar

abhi to nind se bedar bhi nahin hue hain

tamam log gharon mein dubak ke ja baiThen

ye shahr itne pur-asrar bhi nahin hue hain

uThen aur us ki gali mein kahin bhi ja baiThen

'hanif' itne subuksar bhi nahin hue hain