اسیر دہر کو اس کی خبر رہے نہ رہے

اسیر دہر کو اس کی خبر رہے نہ رہے

یہ شب رہے نہ رہے یہ سحر رہے نہ رہے

بدل گئیں یہاں قدریں خلوص و الفت کی

وفائے اہل جنوں معتبر رہے نہ رہے

بھرم نگاہ کا جس دیدہ ور سے قائم ہے

تمہاری بزم میں وہ دیدہ ور رہے نہ رہے

صلہ وفا کا ملا کیا وفا کو دیکھنے کو

کسی نظر میں وہ تاب نظر رہے نہ رہے

سفر تو عمر کا طے کرنا ہی پڑے گا ہمیں

سفر میں چاہے کوئی ہم سفر رہے نہ رہے

بدل نہ دیں رخ غم حادثات وقت کہیں

غم حبیب بھی اب معتبر رہے نہ رہے

ہے گرچہ روشنیٔ شمع رات بھر کی بات

زبیرؔ کس کو خبر رات بھر رہے نہ رہے