asir-e-dahr ko isko KHabar rahe na rahe

asīr-e-dahr ko is kī ḳhabar rahe na rahe

ye shab rahe na rahe ye sahar rahe na rahe

badal ga.iiñ yahāñ qadreñ ḳhulūs-o-ulfat kī

vafā-e-ahl-e-junūñ mo'atabar rahe na rahe

bharam nigāh kā jis dīda-var se qaa.em hai

tumhārī bazm meñ vo dīda-var rahe na rahe

sila vafā kā milā kyā vafā ko dekhne ko

kisī nazar meñ vo tāb-e-nazar rahe na rahe

safar to umr kā tai karnā hī paḌegā hameñ

safar meñ chāhe koī ham-safar rahe na rahe

badal na deñ ruḳh-e-ġham hādsāt-e-vaqt kahīñ

ġham-e-habīb bhī ab mo'atabar rahe na rahe

hai garche raushnī-e-sham.a raat bhar kī baat

'zubair' kis ko ḳhabar rāt-bhar rahe na rahe

asir-e-dahr ko is ki KHabar rahe na rahe

ye shab rahe na rahe ye sahar rahe na rahe

badal gain yahan qadren KHulus-o-ulfat ki

wafa-e-ahl-e-junun mo'atabar rahe na rahe

bharam nigah ka jis dida-war se qaem hai

tumhaari bazm mein wo dida-war rahe na rahe

sila wafa ka mila kya wafa ko dekhne ko

kisi nazar mein wo tab-e-nazar rahe na rahe

safar to umr ka tai karna hi paDega hamein

safar mein chahe koi ham-safar rahe na rahe

badal na den ruKH-e-gham hadsat-e-waqt kahin

gham-e-habib bhi ab mo'atabar rahe na rahe

hai garche raushni-e-shama raat bhar ki baat

'zubair' kis ko KHabar raat-bhar rahe na rahe