asir-e-ishq-e-maraz hain to kya dawa karte

asīr-e-ishq-e-maraz haiñ to kyā davā karte

jo intihā ko pahuñchte to ibtidā karte

agar zamāne meñ apne kabhī vafā karte

dahān-e-zaḳhm taḌapne pe kyuuñ hañsā karte

marīz lazzat-e-fariyād kah nahīñ sakte

jo naale kaam na aate to chup rahā karte

ham un se mil ke bhī furqat kā haal kah na sake

maza visāl kā khote agar gila karte

mazāq-e-dard se nā-vāqifī nahīñ achchhī

kabhī kabhī to mirī dāstāñ sunā karte

shab-e-firāq gavārā na thī magar dekhī

ab aur ḳhātir-e-mehmāñ ziyāda kyā karte

dar-e-qafas na khulā qadr-e-sabr kar sayyād

taḌapte ham to pahāḌoñ meñ rāstā karte

ise jalā ke use aag dī burā na kiyā

jigar jo rakhte the āḳhir vo dil ko kyā karte

zabān vāloñ se sun sun ke hai yaqīñ 'sāqib'

ki bolte to sanam bhī ḳhudā ḳhudā karte

asir-e-ishq-e-maraz hain to kya dawa karte

jo intiha ko pahunchte to ibtida karte

agar zamane mein apne kabhi wafa karte

dahan-e-zaKHm taDapne pe kyun hansa karte

mariz lazzat-e-fariyaad kah nahin sakte

jo nale kaam na aate to chup raha karte

hum un se mil ke bhi furqat ka haal kah na sake

maza visal ka khote agar gila karte

mazaq-e-dard se na-waqifi nahin achchhi

kabhi kabhi to meri dastan suna karte

shab-e-firaq gawara na thi magar dekhi

ab aur KHatir-e-mehman ziyaada kya karte

dar-e-qafas na khula qadr-e-sabr kar sayyaad

taDapte hum to pahaDon mein rasta karte

ise jala ke use aag di bura na kiya

jigar jo rakhte the aaKHir wo dil ko kya karte

zaban walon se sun sun ke hai yaqin 'saqib'

ki bolte to sanam bhi KHuda KHuda karte