asir-e-zat hun apne badan ke andar main

asīr-e-zāt huuñ apne badan ke andar maiñ

rihā.ī qaid-e-anāsir se pā.ūñ kyūñ-kar maiñ

guzar ga.e ka.ī tūfāñ qarīb se ho kar

khaḌā huā sar-e-sāhil huuñ kab se shashdar meñ

kise aziiz nahīñ apne bām-o-dar lekin

huā huuñ soch samajh kar hī kuchh to be-ghar maiñ

safar meñ rah ga.ī sharm-e-barahnagī merī

ġhubār-e-rāh kī oḌhe hue huuñ chādar maiñ

tarāshtā maiñ ḳhud apne na.e na.e paikar

karam se aap ke hotā jo dast-e-but-gar maiñ

mire vajūd kī had hī nahīñ koī lekin

ye aur baat ba-zāhir nahīñ samundar maiñ

safar hayāt kā tai ho rahā hai ai 'rāġhib'

huā savār anāsir ke jab se rath par maiñ

asir-e-zat hun apne badan ke andar main

rihai qaid-e-anasir se paun kyun-kar main

guzar gae kai tufan qarib se ho kar

khaDa hua sar-e-sahil hun kab se shashdar mein

kise aziz nahin apne baam-o-dar lekin

hua hun soch samajh kar hi kuchh to be-ghar main

safar mein rah gai sharm-e-barahnagi meri

ghubar-e-rah ki oDhe hue hun chadar main

tarashta main KHud apne nae nae paikar

karam se aap ke hota jo dast-e-but-gar main

mere wajud ki had hi nahin koi lekin

ye aur baat ba-zahir nahin samundar main

safar hayat ka tai ho raha hai ai 'raghib'

hua sawar anasir ke jab se rath par main