asl mein hun main mujrim maine kyun shikayat ki

asl meñ huuñ maiñ mujrim maiñ ne kyuuñ shikāyat kī

ḳhud pe bas nahīñ is kā umr hai sharārat kī

pyaar kā vahī andāz umr kā vahī āġhāz

garche haiñ mulāqāteñ us se ek muddat kī

dil-navāz ḳhat us ke zā.iqe bahut us ke

rañg phīkā phīkā hai shoḳh hai tabī.at kī

ab harīf sab us ke talḳh roz o shab us ke

kāñpte haiñ lab us ke us ne kyuuñ mohabbat kī

aag sā badan us kā āftāb sī nazreñ

kaun taab lā.egā is qadar tamāzat kī

apne band kamre meñ maiñ pighaltā jaatā huuñ

raat ko nikal aa.ī dhuup kis qayāmat kī

yaad jab bhī kartā huuñ hoñT jalne lagte haiñ

dauḌte lahū meñ haiñ garmiyāñ rifāqat kī

majlisoñ meñ yāroñ ke martabe bahut se haiñ

ek sī hai tanhā.ī ilm aur jahālat kī

maiñ havā kā jhoñkā sā apne-āp meñ gum thā

ye ḳhalā sī tanhā.ī aap ne ināyat kī

ahl-e-zar nahīñ ham log gahrī niiñd sote haiñ

din hazār lamhoñ kā raat ek saa.at kī

pūchhtā nahīñ koī tajrabe ko ab 'shahzād'

ya.anī mubtadī honā shart hai imāmat kī

asl mein hun main mujrim main ne kyun shikayat ki

KHud pe bas nahin is ka umr hai shararat ki

pyar ka wahi andaz umr ka wahi aaghaz

garche hain mulaqaten us se ek muddat ki

dil-nawaz KHat us ke zaiqe bahut us ke

rang phika phika hai shoKH hai tabiat ki

ab harif sab us ke talKH roz o shab us ke

kanpte hain lab us ke us ne kyun mohabbat ki

aag sa badan us ka aaftab si nazren

kaun tab laega is qadar tamazat ki

apne band kamre mein main pighalta jata hun

raat ko nikal aai dhup kis qayamat ki

yaad jab bhi karta hun honT jalne lagte hain

dauDte lahu mein hain garmiyan rifaqat ki

majlison mein yaron ke martabe bahut se hain

ek si hai tanhai ilm aur jahaalat ki

main hawa ka jhonka sa apne-ap mein gum tha

ye KHala si tanhai aap ne inayat ki

ahl-e-zar nahin hum log gahri nind sote hain

din hazar lamhon ka raat ek saat ki

puchhta nahin koi tajrabe ko ab 'shahzad'

yani mubtadi hona shart hai imamat ki