اوج کمال شعر ہے حمد و ثنا گری

اوج کمال شعر ہے حمد و ثنا گری

مجھ کو سکھا گئی ہے یہی کچھ سخنوری

اس دور فتنہ گر میں مری ایک بات سن

سب کچھ ہے صلح ہیچ ہے یہ جنگ و داوری

لشکر کی فکر تاج کا سودا ہے شاہ کو

درویش صرف طالب کنج قلندری

رخ پر جو ہے غبار قناعت اسے نہ دھو

بہتر نہیں ہے اس سے کوئی کیمیا گری

بازار جاں میں شوکت شاہاں کا ذکر کیا

دربار میں تو شرط ہے اظہار چاکری

اے دوست ایک نکتہ بتاؤں تجھے کہ ہے

اقرار بندگی میں نہاں راز سروری

آزادؔ اشک ہائے فراواں کی قدر کر

اشکوں کے نم سے ہے تری کشت سخنوری