aur ai chashm-e-tarab baada-e-gulfam abhi

aur ai chashm-e-tarab bāda-e-gulfām abhī

dil hai be-gāna-e-andesha-e-anjām abhī

bāda-o-sāqī-o-mutrib kā na lo naam abhī

gard-ālūd hai ā.īna-e-ayyām abhī

dil hai majrūh par-o-bāl shikasta hamdam

daam se chhūT ke bhī huuñ maiñ tah-e-dām abhī

mānī-o-maqsad-e-hastī kā samajhnā ma.alūm

aql hai sirf parastārī-e-auhām abhī

ishrat-e-jalva-e-be-bāk mubārak ai ishq

dīda-o-dil haiñ magar tishna-e-paiġhām abhī

ġham nahīñ sab pe agar chashm-e-karam hai terī

ġham to ye hai ki sitam bhī hai tirā aam abhī

ai subuk-sair-e-nazar ek payām-e-rañgīñ

hai harīf-e-ġham-e-dil gardish-e-ayyām abhī

dāvat-e-shauq ba-unvān-e-sitam bhī to nahīñ

us pe ilzām ki hai jazba-e-dil ḳhaam abhī

tū ne kyā chiiz banā dī nigah-e-sehr-tarāz

vo jo thī shīsha-e-dil meñ mai-e-be-nām abhī

zindagī manzil-e-maqsūd se āgāh nahīñ

us kī me.arāj hai parvāz sar-e-bām abhī

kis ko ye hosh ki paiġhām-e-mohabbat samjhe

dil hai vārafta-e-rañgīnī-e-paiġhām abhī

aur ai chashm-e-tarab baada-e-gulfam abhi

dil hai be-gana-e-andesha-e-anjam abhi

baada-o-saqi-o-mutrib ka na lo nam abhi

gard-alud hai aaina-e-ayyam abhi

dil hai majruh par-o-baal shikasta hamdam

dam se chhuT ke bhi hun main tah-e-dam abhi

mani-o-maqsad-e-hasti ka samajhna malum

aql hai sirf parastari-e-auham abhi

ishrat-e-jalwa-e-be-bak mubarak ai ishq

dida-o-dil hain magar tishna-e-paigham abhi

gham nahin sab pe agar chashm-e-karam hai teri

gham to ye hai ki sitam bhi hai tera aam abhi

ai subuk-sair-e-nazar ek payam-e-rangin

hai harif-e-gham-e-dil gardish-e-ayyam abhi

dawat-e-shauq ba-unwan-e-sitam bhi to nahin

us pe ilzam ki hai jazba-e-dil KHam abhi

tu ne kya chiz bana di nigah-e-sehr-taraaz

wo jo thi shisha-e-dil mein mai-e-be-nam abhi

zindagi manzil-e-maqsud se aagah nahin

us ki mearaj hai parwaz sar-e-baam abhi

kis ko ye hosh ki paigham-e-mohabbat samjhe

dil hai warafta-e-rangini-e-paigham abhi