aur ai ghairat-e-gul dhyan rahe ya na rahe

aur ai ġhairat-e-gul dhyān rahe yā na rahe

aan baan apnī rahe jaan rahe yā na rahe

dahan-e-tang muammā hai tumhīñ munsif ho

aql is baat pe hairān rahe yā na rahe

misl-e-mansūr kaheñge na kabhī kalma-e-haq

kāfir-e-ishq haiñ īmān rahe yā na rahe

zulf dariyā meñ vo dhote haiñ balā se un kī

mauj-dar-mauj pareshān rahe yā na rahe

yā-alī qabr meñ pūchheñ jo malak batlānā

shāyad us vaqt hameñ dhyān rahe yā na rahe

abr hai yaar hai gulzār hai ho shaġhl-e-sharāb

phir ye kyā jāniye sāmān rahe yā na rahe

ham to sadqe kā bhī putlā na bane kyā jāneñ

saikḌoñ aap pe qurbān rahe yā na rahe

muft dil le ke baḌe tum to siyāne Thahre

hameñ farmā.iye nādāñ rahe yā na rahe

ruḳhsat-e-rūh-e-ravāñ ho ki na ho batlāo

jāma-e-tan meñ ye mehmān rahe yā na rahe

aaj chaltī hai zabāñ naza.a meñ kal kyā mālūm

baat karne kā bhī imkān rahe yā na rahe

maiñ vo ġham-dost huuñ rāhat se nahīñ kaam ai 'shād'

dard pahlū meñ rahe jaan rahe yā na rahe

aur ai ghairat-e-gul dhyan rahe ya na rahe

aan ban apni rahe jaan rahe ya na rahe

dahan-e-tang muamma hai tumhin munsif ho

aql is baat pe hairan rahe ya na rahe

misl-e-mansur kahenge na kabhi kalma-e-haq

kafir-e-ishq hain iman rahe ya na rahe

zulf dariya mein wo dhote hain bala se un ki

mauj-dar-mauj pareshan rahe ya na rahe

ya-ali qabr mein puchhen jo malak batlana

shayad us waqt hamein dhyan rahe ya na rahe

abr hai yar hai gulzar hai ho shaghl-e-sharab

phir ye kya jaaniye saman rahe ya na rahe

hum to sadqe ka bhi putla na bane kya jaanen

saikDon aap pe qurban rahe ya na rahe

muft dil le ke baDe tum to siyane Thahre

hamein farmaiye nadan rahe ya na rahe

ruKHsat-e-ruh-e-rawan ho ki na ho batlao

jama-e-tan mein ye mehman rahe ya na rahe

aaj chalti hai zaban naza mein kal kya malum

baat karne ka bhi imkan rahe ya na rahe

main wo gham-dost hun rahat se nahin kaam ai 'shad'

dard pahlu mein rahe jaan rahe ya na rahe