اور اے غیرت گل دھیان رہے یا نہ رہے

اور اے غیرت گل دھیان رہے یا نہ رہے

آن بان اپنی رہے جان رہے یا نہ رہے

دہن تنگ معما ہے تمہیں منصف ہو

عقل اس بات پہ حیران رہے یا نہ رہے

مثل منصور کہیں گے نہ کبھی کلمۂ حق

کافر عشق ہیں ایمان رہے یا نہ رہے

زلف دریا میں وہ دھوتے ہیں بلا سے ان کی

موج در موج پریشان رہے یا نہ رہے

یا علیؑ قبر میں پوچھیں جو ملک بتلانا

شاید اس وقت ہمیں دھیان رہے یا نہ رہے

ابر ہے یار ہے گلزار ہے ہو شغل شراب

پھر یہ کیا جانیے سامان رہے یا نہ رہے

ہم تو صدقے کا بھی پتلا نہ بنے کیا جانیں

سیکڑوں آپ پہ قربان رہے یا نہ رہے

مفت دل لے کے بڑے تم تو سیانے ٹھہرے

ہمیں فرمائیے ناداں رہے یا نہ رہے

رخصت روح رواں ہو کہ نہ ہو بتلاؤ

جامۂ تن میں یہ مہمان رہے یا نہ رہے

آج چلتی ہے زباں نزع میں کل کیا معلوم

بات کرنے کا بھی امکان رہے یا نہ رہے

میں وہ غم دوست ہوں راحت سے نہیں کام اے شادؔ

درد پہلو میں رہے جان رہے یا نہ رہے