aur khul ja ki maarif ki guzargahon mein

aur khul jā ki ma.ārif kī guzargāhoñ meñ

pech ai zulf-e-siyah-fām abhī baaqī haiñ

ik subū aur ki lauh-e-dil-e-mai-noshāñ par

kuchh nuqūsh-e-sahar-o-shām abhī baaqī haiñ

Thahar ai bād-e-sahar us gul-e-nau-rasta ke naam

aur bhī shauq ke paiġhām abhī baaqī haiñ

ai harīfān-e-subū gosh-bar-āvāz raho

dāman-e-vahī meñ ilhām abhī baaqī haiñ

tuul khīñch ai shab-e-mai-ḳhāna ki sab kār-e-siyāh

ba-hama lazzat-e-iqdām abhī baaqī haiñ

aur abhī rauñdā nahīñ ai kaf-e-pā-e-tahqīq

dil meñ sau tarah ke auhām abhī baaqī haiñ

ai sahī qad tirī nisbat se sab ūñchī qadreñ

bāvajūd-e-ravish-e-ām abhī baaqī haiñ

ham meñ kal ke na sahī 'hāfiz'-o-'ḳhayyām' 'zafar'

aaj ke 'hāfiz'-o-'ḳhayyām' abhī baaqī haiñ

aur khul ja ki maarif ki guzargahon mein

pech ai zulf-e-siyah-fam abhi baqi hain

ek subu aur ki lauh-e-dil-e-mai-noshan par

kuchh nuqush-e-sahar-o-sham abhi baqi hain

Thahar ai baad-e-sahar us gul-e-nau-rasta ke nam

aur bhi shauq ke paigham abhi baqi hain

ai harifan-e-subu gosh-bar-awaz raho

daman-e-wahi mein ilham abhi baqi hain

tul khinch ai shab-e-mai-KHana ki sab kar-e-siyah

ba-hama lazzat-e-iqdam abhi baqi hain

aur abhi raunda nahin ai kaf-e-pa-e-tahqiq

dil mein sau tarah ke auham abhi baqi hain

ai sahi qad teri nisbat se sab unchi qadren

bawajud-e-rawish-e-am abhi baqi hain

hum mein kal ke na sahi 'hafiz'-o-'KHayyam' 'zafar'

aaj ke 'hafiz'-o-'KHayyam' abhi baqi hain