اور کوئی نہیں ہمارا ہے

اور کوئی نہیں ہمارا ہے

اک تری یاد کا سہارا ہے

بن گیا دل زباں ہلے نہیں لب

ہم نے یوں بھی تجھے پکارا ہے

جو ترے در سے دور گزری ہے

مجھ کو اس زندگی نے مارا ہے

زندگی کیا ہے اک تسلسل ہے

امتحان وفا ہمارا ہے

ہمت دل تری قسم اکثر

ہم کو منزل نے خود پکارا ہے

ہم کو اک آپ کی خوشی کے لیے

ہر غم زندگی گوارا ہے

اہل ہمت کو ہر جگہ ہے سکوں

جو ہے طوفاں وہی کنارا ہے

دوست دامن بچا گئے مظہرؔ

وقت پر ہم نے جب پکارا ہے