aur koi nahin hamara hai

aur koī nahīñ hamārā hai

ik tirī yaad kā sahārā hai

ban gayā dil zabāñ hile nahīñ lab

ham ne yuuñ bhī tujhe pukārā hai

jo tire dar se duur guzrī hai

mujh ko us zindagī ne maarā hai

zindagī kyā hai ik tasalsul hai

imtihān-e-vafā hamārā hai

himmat-e-dil tirī qasam aksar

ham ko manzil ne ḳhud pukārā hai

ham ko ik aap kī ḳhushī ke liye

har ġham-e-zindagī gavārā hai

ahl-e-himmat ko har jagah hai sukūñ

jo hai tūfāñ vahī kinārā hai

dost dāman bachā ga.e 'maz.har'

vaqt par ham ne jab pukārā hai

aur koi nahin hamara hai

ek teri yaad ka sahaara hai

ban gaya dil zaban hile nahin lab

hum ne yun bhi tujhe pukara hai

jo tere dar se dur guzri hai

mujh ko us zindagi ne mara hai

zindagi kya hai ek tasalsul hai

imtihan-e-wafa hamara hai

himmat-e-dil teri qasam aksar

hum ko manzil ne KHud pukara hai

hum ko ek aap ki KHushi ke liye

har gham-e-zindagi gawara hai

ahl-e-himmat ko har jagah hai sukun

jo hai tufan wahi kinara hai

dost daman bacha gae 'mazhar'

waqt par hum ne jab pukara hai