aur kuchh din yahan rukne ka bahana milta

aur kuchh din yahāñ rukne kā bahāna miltā

is na.e shahr meñ koī to purānā miltā

maiñ to jo kuchh bhī thā jitnā bhī thā sab miTTī thā

tum agar DhūñDte mujh meñ to ḳhazāna miltā

mujh ko hañsne ke liye dost mayassar haiñ bahut

kaash rone ke liye bhī koī shāna miltā

maiñ kaḌī dhuup meñ bhaTkā huuñ tumhārī ḳhātir

tum jo mil jaate to mausam bhī suhāna miltā

mere aañsū tirī āñkhoñ se chhalakte kisī roz

terī zulfoñ se kisī din mirā shāna miltā

tum ne jaate hue dekhā hī nahīñ merī taraf

varna mujh meñ tumheñ apnā hī fasāna miltā

saath rahne kī chukā.ī hai baḌī qīmat bhī

chhoḌ dete jo tujhe ham to zamāna miltā

khet par lagne lage pahre ḳhazānoñ kī tarah

yuuñ na hotā to parindoñ ko bhī daana miltā

le ga.e ham hī use mandir-o-masjid kī taraf

varna har raah meñ us kā hī Thikāna miltā

aur kuchh din yahan rukne ka bahana milta

is nae shahr mein koi to purana milta

main to jo kuchh bhi tha jitna bhi tha sab miTTi tha

tum agar DhunDte mujh mein to KHazana milta

mujh ko hansne ke liye dost mayassar hain bahut

kash rone ke liye bhi koi shana milta

main kaDi dhup mein bhaTka hun tumhaari KHatir

tum jo mil jate to mausam bhi suhana milta

mere aansu teri aankhon se chhalakte kisi roz

teri zulfon se kisi din mera shana milta

tum ne jate hue dekha hi nahin meri taraf

warna mujh mein tumhein apna hi fasana milta

sath rahne ki chukai hai baDi qimat bhi

chhoD dete jo tujhe hum to zamana milta

khet par lagne lage pahre KHazanon ki tarah

yun na hota to parindon ko bhi dana milta

le gae hum hi use mandir-o-masjid ki taraf

warna har rah mein us ka hi Thikana milta