aur kya mujhse koi sahib-nazar le jaega

aur kyā mujh se koī sāhib-nazar le jā.egā

apne chehre par mirī gard-e-safar le jā.egā

dastaras āsāñ nahīñ kuchh ḳhirman-e-ma.anī talak

jo bhī aa.egā vo lafzoñ ke guhar le jā.egā

chhāñv meñ naḳhl-e-junūñ kī aao Thahrā leñ use

kaun jaltī dhuup ko sahrā se ghar le jā.egā

āsmāñ kī khoj meñ ham se zamīñ bhī kho ga.ī

kitnī pastī meñ mazāq-e-bāl-o-par le jā.egā

maiñ hī tanhā huuñ yahāñ us kī salābat kā gavāh

kaun uThā kar ye mirā sañg-e-hunar le jā.egā

kaaT kar dast-e-duā ko mere ḳhush ho le magar

tū kahāñ āḳhir ye shāḳh-e-be-samar le jā.egā

past rakkho apnī āvāzoñ ko varna duur tak

baat ghar kī raḳhna-e-dīvār-o-dar le jā.egā

maiñ uThātā huuñ qadam hālāt kī rau ke ḳhilāf

jāntā huuñ vaqt kā jhoñkā kidhar le jā.egā

itnī lambī bhī nahīñ logo ye gumnāmī kī umr

DhūñDh kar mujh ko shu.ūr-e-mo.atabar le jā.egā

kārobār-e-zindagī tak haiñ ye hañgāme 'fazā'

kyā vo saaya chhoḌ degā jo shajar le jā.egā

aur kya mujh se koi sahib-nazar le jaega

apne chehre par meri gard-e-safar le jaega

dastaras aasan nahin kuchh KHirman-e-mani talak

jo bhi aaega wo lafzon ke guhar le jaega

chhanw mein naKHl-e-junun ki aao Thahra len use

kaun jalti dhup ko sahra se ghar le jaega

aasman ki khoj mein hum se zamin bhi kho gai

kitni pasti mein mazaq-e-baal-o-par le jaega

main hi tanha hun yahan us ki salabat ka gawah

kaun uTha kar ye mera sang-e-hunar le jaega

kaT kar dast-e-dua ko mere KHush ho le magar

tu kahan aaKHir ye shaKH-e-be-samar le jaega

past rakkho apni aawazon ko warna dur tak

baat ghar ki raKHna-e-diwar-o-dar le jaega

main uThata hun qadam haalat ki rau ke KHilaf

jaanta hun waqt ka jhonka kidhar le jaega

itni lambi bhi nahin logo ye gumnami ki umr

DhunDh kar mujh ko shuur-e-moatabar le jaega

karobar-e-zindagi tak hain ye hangame 'faza'

kya wo saya chhoD dega jo shajar le jaega