اور پھر اک دن تنگ آ کر تنہائی سے

اور پھر اک دن تنگ آ کر تنہائی سے

جا لپٹیں گے ہم اپنی پرچھائی سے

تم کو دیکھا آنکھوں میں محفوظ کیا

اب ہم کو کوئی کام نہیں بینائی سے

تم کو بس الزام ہی دینا آتا ہے

تم کو کیا لینا دینا سچائی سے

دل میں ارمانوں کی لاش پڑی ہے اور

گونج رہا ہے سارا گھر شہنائی سے

اس کو رجھانے کو میں نے سو جتن کئے

اس نے کام کیا یہ اک انگڑائی سے

جانے والوں سے کیوں کوئی ربط رکھوں

درد پرانا بڑھتا ہے پروائی سے

وہ کہتی ہے میری آنکھوں میں دیکھو

اور اک میں جو ڈرتا ہوں گہرائی سے

ان کو تو بس یار سے مطلب ہوتا ہے

دیوانے ڈرتے کب ہیں رسوائی سے