aur to kuchh na hua pi ke bahak jaane se

aur to kuchh na huā pī ke bahak jaane se

baat mai-ḳhāne kī bāhar ga.ī mai-ḳhāne se

koī paimāna laḌā jab kisī paimāne se

ham ne samjhā ki pukārā gayā mai-ḳhāne se

do nigāhoñ kā javānī meñ hai aisā milnā

jaise dīvāne kā milnā kisī dīvāne se

dil kī duniyā meñ saverā sā nazar aatā hai

hasrateñ jaag uThī haiñ tire aa jaane se

dil kī ujḌī huī hālat pe na jaa.e koī

shahr ābād hue haiñ isī vīrāne se

jalva-gar aaj unheñ bhī sar-e-mimbar dekhā

jin ko dekhā thā nikalte hue mai-ḳhāne se

dar-o-dīvār pe qabza hai udāsī 'nazīr'

ghar mirā ghar na rahā un ke chale jaane se

aur to kuchh na hua pi ke bahak jaane se

baat mai-KHane ki bahar gai mai-KHane se

koi paimana laDa jab kisi paimane se

hum ne samjha ki pukara gaya mai-KHane se

do nigahon ka jawani mein hai aisa milna

jaise diwane ka milna kisi diwane se

dil ki duniya mein sawera sa nazar aata hai

hasraten jag uThi hain tere aa jaane se

dil ki ujDi hui haalat pe na jae koi

shahr aabaad hue hain isi virane se

jalwa-gar aaj unhen bhi sar-e-mimbar dekha

jin ko dekha tha nikalte hue mai-KHane se

dar-o-diwar pe qabza hai udasi 'nazir'

ghar mera ghar na raha un ke chale jaane se