aur un aankhon ne mere dil ki haalat zar ki

aur un āñkhoñ ne mere dil kī hālat zaar kī

ho nahīñ saktī davā bīmār se bīmār kī

mohr kī un par zarūrat kyā hai ai pīr-e-muġhāñ

ek ik ḳham par lagī hai aañkh har mai-ḳhvār kī

ḳhair ho yā-rab kahīñ vo ḳhud na ban jaa.eñ raqīb

aa.ine par aaj paḌtī haiñ nigāheñ pyaar kī

ḳhuun kar ke dil hamārā phir ga.ī vo mast aañkh

ek hī chullū meñ niyyat bhar ga.ī mai-ḳhvār kī

diid ke tālib the muusā tuur ko thī kyā ḳhabar

phūñk kar rakh degī bijlī jalva-e-dīdār kī

jalva-e-mahbūb se ḳhālī na dekhā dil koī

aa.ine haiñ saikḌoñ aur ek sūrat yaar kī

ho subuk-raftār kitnī hī nasīm-e-sub.h-dam

aañkh khul jaatī hai phir bhī nargis-e-bīmār kī

duḳhtar-e-raz ne diye chhīñTe kuchh aise sāqiyā

paanī paanī ho ga.ī tauba har ik mai-ḳhvār kī

kuchh phale-phūle na ye nāzuk mazāmīñ ai 'jalīl'

be-khile murjhā ga.iiñ kaliyāñ mire gulzār kī

aur un aankhon ne mere dil ki haalat zar ki

ho nahin sakti dawa bimar se bimar ki

mohr ki un par zarurat kya hai ai pir-e-mughan

ek ek KHam par lagi hai aankh har mai-KHwar ki

KHair ho ya-rab kahin wo KHud na ban jaen raqib

aaine par aaj paDti hain nigahen pyar ki

KHun kar ke dil hamara phir gai wo mast aankh

ek hi chullu mein niyyat bhar gai mai-KHwar ki

did ke talib the musa tur ko thi kya KHabar

phunk kar rakh degi bijli jalwa-e-didar ki

jalwa-e-mahbub se KHali na dekha dil koi

aaine hain saikDon aur ek surat yar ki

ho subuk-raftar kitni hi nasim-e-subh-dam

aankh khul jati hai phir bhi nargis-e-bimar ki

duKHtar-e-raz ne diye chhinTe kuchh aise saqiya

pani pani ho gai tauba har ek mai-KHwar ki

kuchh phale-phule na ye nazuk mazamin ai 'jalil'

be-khile murjha gain kaliyan mere gulzar ki