اوروں کے واسطے جو اجل کا پیام ہے

اوروں کے واسطے جو اجل کا پیام ہے

میرے لیے وہ آب بقائے دوام ہے

پوچھی جو قتل عام کی توجیہہ تو کہا

گزرا ابھی یہاں سے قیامت خرام ہے

تو دوست ہو خدا کا یہ مشکل نہیں تجھے

نوع بشر ترا بھی عجائب مقام ہے

پوچھا کسی نے شمع سے دیتا ہے جان کیوں

اس نے دیا جواب یہ سوز تمام ہے

آغاز کا پتا ہے نہ منزل کی کچھ خبر

کچھ دیر کو سرائے کہن میں قیام ہے

عاشق ہوا ہے اس پہ یہ نادان دل مرا

جس کا ستم جہان میں مشہور عام ہے

مہلت ذرا مجھے ابھی کچھ اور چاہیے

اے مرگ میرا کام ابھی ناتمام ہے