auron pe ittifaq se sabqat mili mujhe

auroñ pe ittifāq se sabqat milī mujhe

bhūle se sar-kashī kī rivāyat milī mujhe

ġhairoñ kī dostī se kise hamdamī milī

sab se bichhaḌ ke apnī rifāqat milī mujhe

shahroñ meñ bhī sarāb kī tahrīr paḌh sakā

nā-bīnā falsafī kī basārat milī mujhe

bas merā zikr aate hī mahfil ujaḌ ga.ī

shaitāñ ke ba.ad dūsrī shohrat milī mujhe

duniyā meñ roz hashr kā hañgām dekh kar

mahjūb sar barahna qayāmat milī mujhe

kuchh dil-ḳharāsh sher kahe aur chal basā

haañ zindagī meñ itnī hī mohlat milī mujhe

sochā thā apne ahd kā ik marsiya likhūñ

'bāqar' ġhazal hī kahne kī fursat milī mujhe

auron pe ittifaq se sabqat mili mujhe

bhule se sar-kashi ki riwayat mili mujhe

ghairon ki dosti se kise hamdami mili

sab se bichhaD ke apni rifaqat mili mujhe

shahron mein bhi sarab ki tahrir paDh saka

na-bina falsafi ki basarat mili mujhe

bas mera zikr aate hi mahfil ujaD gai

shaitan ke baad dusri shohrat mili mujhe

duniya mein roz hashr ka hangam dekh kar

mahjub sar barahna qayamat mili mujhe

kuchh dil-KHarash sher kahe aur chal basa

han zindagi mein itni hi mohlat mili mujhe

socha tha apne ahd ka ek marsiya likhun

'baqar' ghazal hi kahne ki fursat mili mujhe