اوروں سے دل لگانے کی عادت نہیں مجھے

اوروں سے دل لگانے کی عادت نہیں مجھے

تیرے سوا کسی سے محبت نہیں مجھے

آئے نظر نہ جس میں ترا عکس خوش جمال

اس آئنے کی کوئی ضرورت نہیں مجھے

جس دن سے تیرے ہجر کا پایا ہے میں نے غم

بزم طرب میں رہنے کی چاہت نہیں مجھے

ذکر شب فراق سے آتا ہے مجھ کو خوف

ورنہ کسی بھی چیز سے وحشت نہیں مجھے

میں تجھ کو سوچنے میں ہوں مشغول اس طرح

خود اپنا سوچنے کی بھی فرصت نہیں مجھے

آنکھوں کو تیرے چہرے کا دیدار ہو نصیب

اب اور زیست میں کوئی حسرت نہیں مجھے

جو بات دل میں ہے وہ بیاں کس طرح کروں

محکمؔ کہ لب کشائی کی جرأت نہیں مجھے