auron se dil lagane ki aadat nahin mujhe

auroñ se dil lagāne kī 'ādat nahīñ mujhe

tere sivā kisī se mohabbat nahīñ mujhe

aa.e nazar na jis meñ tirā 'aks-e-ḳhush-jamāl

us aa.ine kī koī zarūrat nahīñ mujhe

jis din se tere hijr kā paayā hai maiñ ne ġham

bazm-e-tarab meñ rahne kī chāhat nahīñ mujhe

zikr-e-shab-e-firāq se aatā hai mujh ko ḳhauf

varna kisī bhī chiiz se vahshat nahīñ mujhe

maiñ tujh ko sochne meñ huuñ mashġhūl is tarah

ḳhud apnā sochne kī bhī fursat nahīñ mujhe

āñkhoñ ko tere chehre kā dīdār ho nasīb

ab aur ziist meñ koī hasrat nahīñ mujhe

jo baat dil meñ hai vo bayāñ kis tarah karūñ

'mohkam' ki lab-kushā.ī kī jur.at nahīñ mujhe

auron se dil lagane ki 'adat nahin mujhe

tere siwa kisi se mohabbat nahin mujhe

aae nazar na jis mein tera 'aks-e-KHush-jamal

us aaine ki koi zarurat nahin mujhe

jis din se tere hijr ka paya hai main ne gham

bazm-e-tarab mein rahne ki chahat nahin mujhe

zikr-e-shab-e-firaq se aata hai mujh ko KHauf

warna kisi bhi chiz se wahshat nahin mujhe

main tujh ko sochne mein hun mashghul is tarah

KHud apna sochne ki bhi fursat nahin mujhe

aankhon ko tere chehre ka didar ho nasib

ab aur zist mein koi hasrat nahin mujhe

jo baat dil mein hai wo bayan kis tarah karun

'mohkam' ki lab-kushai ki jurat nahin mujhe