awwal to ye dhaj aur ye raftar ghazab hai

avval to ye dhaj aur ye raftār ġhazab hai

tis pe tire pāzeb kī jhankār ġhazab hai

kyūñkar na tujhe dauḌ ke chhātī se lagā luuñ

phūloñ kā gale meñ tire ye haar ġhazab hai

jab dekhūñ huuñ kartī hai mire dil ko pareshāñ

āshuftagī-e-turra-e-tarrār ġhazab hai

ai kaash ye āñkheñ mujhe ye din na dikhātīñ

is shauq pe mahrūmī-e-dīdār ġhazab hai

ḳhurshīd kā muñh hai ki taraf ho sake us se

ya.anī vo bar-afroḳhta ruḳhsār ġhazab hai

maiñ aur kisī baat kā shākī nahīñ tujh se

ye vaqt ke uupar tirā inkār ġhazab hai

ab tak haram-e-vasl se mahram na hue ham

ka.abe meñ hijāb-e-dar-o-dīvār ġhazab hai

gar ek ġhazab ho to koī us ko uThāve

raftār ġhazab hai tirī guftār ġhazab hai

farhād bachā ishq se ne qais na vāmiq

jī le hī ke jaatā hai ye āzār ġhazab hai

ai 'mus.hafī' is shauq se Tuk bach ke tū chalnā

suntā hai miyāñ vo but-e-ḳhūñ-ḳhār ġhazab hai

awwal to ye dhaj aur ye raftar ghazab hai

tis pe tere pazeb ki jhankar ghazab hai

kyunkar na tujhe dauD ke chhati se laga lun

phulon ka gale mein tere ye haar ghazab hai

jab dekhun hun karti hai mere dil ko pareshan

aashuftagi-e-turra-e-tarrar ghazab hai

ai kash ye aankhen mujhe ye din na dikhatin

is shauq pe mahrumi-e-didar ghazab hai

KHurshid ka munh hai ki taraf ho sake us se

yani wo bar-afroKHta ruKHsar ghazab hai

main aur kisi baat ka shaki nahin tujh se

ye waqt ke upar tera inkar ghazab hai

ab tak haram-e-wasl se mahram na hue hum

kabe mein hijab-e-dar-o-diwar ghazab hai

gar ek ghazab ho to koi us ko uThawe

raftar ghazab hai teri guftar ghazab hai

farhad bacha ishq se ne qais na wamiq

ji le hi ke jata hai ye aazar ghazab hai

ai 'mushafi' is shauq se Tuk bach ke tu chalna

sunta hai miyan wo but-e-KHun-KHar ghazab hai