awwalan us be-nishan aur ba-nishan ko ishq hai

avvalan us be-nishāñ aur bā-nishāñ ko ishq hai

ba.ad-azāñ sar halqa-e-paiġham-barāñ ko ishq hai

lā-fatā-illā-alī hai shaan meñ jis kī nuzūl

dostāñ us shāh-e-mardāñ se javāñ ko ishq hai

phir jo hai bāġh-e-nabuvvat aur imāmat kī bahār

ġhuncha-e-gul sabza-e-ambar-fishāñ ko ishq hai

arsh o kursī huur o ġhilmāñ aur malā.ek ḳhaas o aam

ālam-e-bālā ke sab bāshindagāñ ko ishq hai

haiñ jo ye chaudah tabaq mut.harrik o sākin sadā

be-suḳhan un sab zamīn-o-āsmāñ ko ishq hai

muḳhtalif haiñ aur mile rahte haiñ bāham roz-o-shab

ḳhaak baad o ātish o āb-e-ravāñ ko ishq hai

hai jahāñ meñ jin se raushan adl ke ghar kā charāġh

dam-ba-dam un bādshāhān-e-jahāñ ko ishq hai

aur ḳhurāsāñ asfahān īrān aur tūrān ko

phir hamāre gulshan-e-hindostāñ ko ishq hai

haiñ jahāñ tak silsile fuqarā ke az-kah-tā-bah-mah

ārifāñ aur kāmilāñ aur āshiqāñ ko ishq hai

koh tharrāte haiñ larzeñ haiñ zamīn o āsmān

āshiq-e-maulā kī fariyād-o-fuġhāñ ko ishq hai

har taraf gulzār hai sabzān aur āb-e-ravāñ

apnī nazroñ meñ bahār-e-gul-fashāñ ko ishq hai

vo jo haiñ is gulshan-e-hastī meñ ab mahv-e-fanā

un ke aage mausam-e-bād-e-ḳhizāñ ko ishq hai

gard ke mānind phirtī haiñ paḌī uḌtī ḳharāb

luT ga.ī dast-e-junūñ kī kārvāñ ko ishq hai

loTte haiñ mast mai-ḳhāne ke dar par jā-ba-jā

jaam o sahbā saaqī o pīr-e-muġhāñ ko ishq hai

kal hī naqsh-e-zā.iqa sun kar bhī ham aamil rahe

ai azīzāñ is hayāt-e-rā.egāñ ko ishq hai

ḳhilqat-e-kaunain meñ kyā jin o kyā insāñ 'nazīr'

vahshī o taa.ir zabāñ o be-zabāñ ko ishq hai

awwalan us be-nishan aur ba-nishan ko ishq hai

baad-azan sar halqa-e-paigham-baran ko ishq hai

la-fata-illa-ali hai shan mein jis ki nuzul

dostan us shah-e-mardan se jawan ko ishq hai

phir jo hai bagh-e-nabuwwat aur imamat ki bahaar

ghuncha-e-gul sabza-e-ambar-fishan ko ishq hai

arsh o kursi hur o ghilman aur malaek KHas o aam

aalam-e-baala ke sab bashindagan ko ishq hai

hain jo ye chaudah tabaq mutharrik o sakin sada

be-suKHan un sab zamin-o-asman ko ishq hai

muKHtalif hain aur mile rahte hain baham roz-o-shab

KHak baad o aatish o aab-e-rawan ko ishq hai

hai jahan mein jin se raushan adl ke ghar ka charagh

dam-ba-dam un baadshahan-e-jahan ko ishq hai

aur KHurasan asfahan iran aur turan ko

phir hamare gulshan-e-hindostan ko ishq hai

hain jahan tak silsile fuqara ke az-kah-ta-bah-mah

aarifan aur kaamilan aur aashiqan ko ishq hai

koh tharraate hain larzen hain zamin o aasman

aashiq-e-maula ki fariyaad-o-fughan ko ishq hai

har taraf gulzar hai sabzan aur aab-e-rawan

apni nazron mein bahaar-e-gul-fashan ko ishq hai

wo jo hain is gulshan-e-hasti mein ab mahw-e-fana

un ke aage mausam-e-baad-e-KHizan ko ishq hai

gard ke manind phirti hain paDi uDti KHarab

luT gai dast-e-junun ki karwan ko ishq hai

loTte hain mast mai-KHane ke dar par ja-ba-ja

jam o sahba saqi o pir-e-mughan ko ishq hai

kal hi naqsh-e-zaiqa sun kar bhi hum aamil rahe

ai azizan is hayat-e-raegan ko ishq hai

KHilqat-e-kaunain mein kya jin o kya insan 'nazir'

wahshi o tair zaban o be-zaban ko ishq hai