awwalin shart hai insan ka insan hona

avvalīñ shart hai insān kā insāñ honā

ba.ad kī baat hai hindū yā musalmāñ honā

jo bhī aatā hai vo kaliyoñ ko masal jaatā hai

ik hasīñ khel hai gulshan kā nigahbāñ honā

ahl-e-dānish ne kabhī ḳhvāb meñ sochā bhī na thā

jurm ban jā.egā is daur meñ insāñ honā

adl hai maslahat-e-vaqt ke panje se asiir

saḳht mushkil hai yahāñ sāhab-e-īmāñ honā

jashn-e-be-chārgī jis vaqt manāte hoñ avaam

nā-munāsib sā hai us vaqt ġhazal-ḳhvāñ honā

ban gayā jehl ke baḌhne kā sabab ai 'ishrat'

yak-ba-yak ilm kī sham.a kā farozāñ honā

awwalin shart hai insan ka insan hona

baad ki baat hai hindu ya musalman hona

jo bhi aata hai wo kaliyon ko masal jata hai

ek hasin khel hai gulshan ka nigahban hona

ahl-e-danish ne kabhi KHwab mein socha bhi na tha

jurm ban jaega is daur mein insan hona

adl hai maslahat-e-waqt ke panje se asir

saKHt mushkil hai yahan sahab-e-iman hona

jashn-e-be-chaargi jis waqt manate hon awam

na-munasib sa hai us waqt ghazal-KHwan hona

ban gaya jehl ke baDhne ka sabab ai 'ishrat'

yak-ba-yak ilm ki shama ka farozan hona