ayaadat hoti jati hai ibaadat hoti jati hai

ayādat hotī jaatī hai ibādat hotī jaatī hai

mere marne kī dekho sab ko aadat hotī jaatī hai

namī sī aañkh meñ aur hoñT bhī bhīge hue se haiñ

ye bhīgā-pan hī dekho muskurāhaT hotī jaatī hai

tere qadmoñ kī aahaT ko hai dil ye DhūñDhtā har dam

har ik āvāz pe ik thartharāhaT hotī jaatī hai

ye kaisī yaas hai rone kī bhī aur muskurāne kī

ye kaisā dard hai ki jhunjhunāhaT hotī jaatī hai

kabhī to ḳhūbsūrat apnī hī āñkhoñ meñ aise the

kisī ġham-ḳhāna se goyā mohabbat hotī jaatī hai

ḳhud hī ko tez nāḳhūnoñ se haa.e nochte haiñ ab

hameñ allāh ḳhud se kaisī ulfat hotī jaatī hai

ayaadat hoti jati hai ibaadat hoti jati hai

mere marne ki dekho sab ko aadat hoti jati hai

nami si aankh mein aur honT bhi bhige hue se hain

ye bhiga-pan hi dekho muskurahaT hoti jati hai

tere qadmon ki aahaT ko hai dil ye DhunDhta har dam

har ek aawaz pe ek thartharahaT hoti jati hai

ye kaisi yas hai rone ki bhi aur muskurane ki

ye kaisa dard hai ki jhunjhunahaT hoti jati hai

kabhi to KHubsurat apni hi aankhon mein aise the

kisi gham-KHana se goya mohabbat hoti jati hai

KHud hi ko tez naKHunon se hae nochte hain ab

hamein allah KHud se kaisi ulfat hoti jati hai