ayan nahin hai koi chiz to nihan bhi nahin

ayaañ nahīñ hai koī chiiz to nihāñ bhī nahīñ

kahīñ dhuāñ hī dhuāñ hai kahīñ dhuāñ bhī nahīñ

dayār-e-dil se hamārā bhī qāfila guzrā

makīn badle hue aur vo makāñ bhī nahīñ

nadāmatoñ ne kushāda kiyā savād-e-sahar

to ab ḳhayāl-e-shab-e-māh-o-kahkashāñ bhī nahīñ

yahī bahut hai milā ḳhaak meñ na azm-e-safar

sarā.e duur kahīñ raah meñ kuaañ bhī nahīñ

ye kaise dast-e-sabā aaj ho gayā rangīn

lahū meñ Duubī huī shāḳh-e-āshiyāñ bhī nahīñ

sunāo hāl-e-dil-e-be-qarār vahshī ko

ki us ke paas madāvā-e-rā.egāñ bhī nahīñ

ayan nahin hai koi chiz to nihan bhi nahin

kahin dhuan hi dhuan hai kahin dhuan bhi nahin

dayar-e-dil se hamara bhi qafila guzra

makin badle hue aur wo makan bhi nahin

nadamaton ne kushada kiya sawad-e-sahar

to ab KHayal-e-shab-e-mah-o-kahkashan bhi nahin

yahi bahut hai mila KHak mein na azm-e-safar

sarae dur kahin rah mein kuan bhi nahin

ye kaise dast-e-saba aaj ho gaya rangin

lahu mein Dubi hui shaKH-e-ashiyan bhi nahin

sunao haal-e-dil-e-be-qarar wahshi ko

ki us ke pas madawa-e-raegan bhi nahin