ayyam-e-shabab apne bhi kya aish-asar the

ayyām-e-shabāb apne bhī kyā aish-asar the

kahte haiñ jinheñ aib vo us vaqt hunar the

din-rāt vo mahbūb mayassar the ki jin kī

zulfeñ alam-e-shām thiiñ ruḳh rashk-e-sahar the

saaqī ke idhar jaam idhar nāz-o-adā se

jādū-nazrāñ ḳhush-nighāñ pesh-e-nazar the

mahfil se jo uThte the zarā ham to lipaT kar

nāzuk-badnāñ mū-kamarāñ dast-o-kamar the

hamrāh gul-andāmoñ ke ho ḳhurram-o-ḳhandāñ

bāġh-o-chaman-o-gulshan-o-bustāñ meñ guzar the

kyā shor the kyā zor the har lahza ahā-hā

kyā valvale kyā qahqahe be-ḳhauf-o-ḳhatar the

dikhlā ke jhamak jaate rahe dam meñ 'nazīr' aah

kyā jaane vo din barq the yā misl-e-sharar the

ayyam-e-shabab apne bhi kya aish-asar the

kahte hain jinhen aib wo us waqt hunar the

din-raat wo mahbub mayassar the ki jin ki

zulfen alam-e-sham thin ruKH rashk-e-sahar the

saqi ke idhar jam idhar naz-o-ada se

jadu-nazran KHush-nighan pesh-e-nazar the

mahfil se jo uThte the zara hum to lipaT kar

nazuk-badnan mu-kamaran dast-o-kamar the

hamrah gul-andamon ke ho KHurram-o-KHandan

bagh-o-chaman-o-gulshan-o-bustan mein guzar the

kya shor the kya zor the har lahza aha-ha

kya walwale kya qahqahe be-KHauf-o-KHatar the

dikhla ke jhamak jate rahe dam mein 'nazir' aah

kya jaane wo din barq the ya misl-e-sharar the