عذاب اپنے مقدر میں اور کیا ہوگا

عذاب اپنے مقدر میں اور کیا ہوگا

خیال و خواب میں صدیوں کا فاصلہ ہوگا

وفور باد مخالف سے کانپتے ہیں شجر

لچکتی شاخ سے پتا کوئی گرا ہوگا

سنائیں کس کو یہ روداد کاوش ناکام

کہ یہ فسانۂ غم تو کہا سنا ہوگا

ہماری بزم بصیرت ہماری شمع خیال

وہ ہم نہیں جنہیں اوروں کا آسرا ہوگا

لٹا تو دیں اسی محفل میں نور کی سوغات

یہاں پہ کون مگر رمز آشنا ہوگا

ہے شوق رمز سفر اور خیال مشعل راہ

کبھی تو نور ازل تیرا سامنا ہوگا