azab apne muqaddar mein aur kya hoga

azaab apne muqaddar meñ aur kyā hogā

ḳhayāl-o-ḳhvāb meñ sadiyoñ kā fāsla hogā

vafūr-e-bād-e-muḳhālif se kāñpte haiñ shajar

lachaktī shāḳh se pattā koī girā hogā

sunā.eñ kis ko ye rūdād-e-kāvish-e-nākām

ki ye fasāna-e-ġham to kahā sunā hogā

hamārī bazm-e-basīrat hamārī sham-e-ḳhayāl

vo ham nahīñ jinheñ auroñ kā aasrā hogā

luTā to deñ isī mahfil meñ nuur kī sauġhāt

yahāñ pe kaun magar ramz-āshnā hogā

hai shauq-e-ramz-e-safar aur ḳhayāl-e-mish.al-e-rāh

kabhī to nūr-e-azal terā sāmnā hogā

azab apne muqaddar mein aur kya hoga

KHayal-o-KHwab mein sadiyon ka fasla hoga

wafur-e-baad-e-muKHalif se kanpte hain shajar

lachakti shaKH se patta koi gira hoga

sunaen kis ko ye rudad-e-kawish-e-nakaam

ki ye fasana-e-gham to kaha suna hoga

hamari bazm-e-basirat hamari sham-e-KHayal

wo hum nahin jinhen auron ka aasra hoga

luTa to den isi mahfil mein nur ki saughat

yahan pe kaun magar ramz-ashna hoga

hai shauq-e-ramz-e-safar aur KHayal-e-mishal-e-rah

kabhi to nur-e-azal tera samna hoga