عذاب رخت سفر سے خموش ہوتے ہوئے

عذاب رخت سفر سے خموش ہوتے ہوئے

کسی کو دیکھا ہے خانہ بدوش ہوتے ہوئے

اس آدمی کو فقط شوق باغبانی ہے

اداس ہوگا بہت گل فروش ہوتے ہوئے

درخت ایسے خد و خال میں ملا مجھ کو

سراپا زرد لگا سبز پوش ہوتے ہوئے

صدائے داد سخن بزم میں کچھ ایسی تھی

کہ لوگ چیخ رہے تھے خموش ہوتے ہوئے

بہت سے لوگ تو اب بھی ہیں گمرہی کے شکار

بھٹک رہے ہیں پیام سروش ہوتے ہوئے

بس اس کے ایک ہی جلوہ سے تم ہوئے بے ہوش

تمہیں بھی آ گیا غش اہل ہوش ہوتے ہوئے

سفر میں اب کے وہ زاد سفر رہا دلبرؔ

لگا نہ بار گراں بار دوش ہوتے ہوئے