azab-e-raKHt-e-safar se KHamosh hote hue

azāb-e-raḳht-e-safar se ḳhamosh hote hue

kisī ko dekhā hai ḳhāna-ba-dosh hote hue

us aadmī ko faqat shauq-e-bāġhbānī hai

udaas hogā bahut gul-farosh hote hue

daraḳht aise ḳhad-o-ḳhāl meñ milā mujh ko

sarāpā zard lagā sabz-posh hote hue

sadā-e-dād-e-suḳhan bazm meñ kuchh aisī thī

ki log chīḳh rahe the ḳhamosh hote hue

bahut se log to ab bhī haiñ gumrahī ke shikār

bhaTak rahe haiñ payām-e-sarosh hote hue

bas us ke ek hī jalve se tum hue behosh

tumheñ bhī aa gayā ġhash ahl-e-hosh hote hue

safar meñ ab ke vo zād-e-safar rahā 'dilbar'

lagā na bār-e-garāñ bār-e-dosh hote hue

azab-e-raKHt-e-safar se KHamosh hote hue

kisi ko dekha hai KHana-ba-dosh hote hue

us aadmi ko faqat shauq-e-baghbani hai

udas hoga bahut gul-farosh hote hue

daraKHt aise KHad-o-KHal mein mila mujh ko

sarapa zard laga sabz-posh hote hue

sada-e-dad-e-suKHan bazm mein kuchh aisi thi

ki log chiKH rahe the KHamosh hote hue

bahut se log to ab bhi hain gumrahi ke shikar

bhaTak rahe hain payam-e-sarosh hote hue

bas us ke ek hi jalwe se tum hue behosh

tumhein bhi aa gaya ghash ahl-e-hosh hote hue

safar mein ab ke wo zad-e-safar raha 'dilbar'

laga na bar-e-garan bar-e-dosh hote hue