عذاب تشنہ لبی کا شکار تھا وہ شخص

عذاب تشنہ لبی کا شکار تھا وہ شخص

اگرچہ میرے لئے آبشار تھا وہ شخص

چھپا چھپا کے بھی خود میں چھپا نہ پایا مجھے

کھنڈر کے چاروں طرف اک حصار تھا وہ شخص

وہ جانتا تھا حسیں انگلیوں کی زہرابی

اسی لئے تو گل خار دار تھا وہ شخص

سفید چاندنی کی ریشمی رومال اوڑھے

سیاہ رات کے رتھ پر سوار تھا وہ شخص

نہ تھا غلام کسی مادی سہارے کا

بغیر عصا کے سمندر گزار تھا وہ شخص

ہر ایک لمحے کے آخر میں مجھ سے لڑتا تھا

نیازؔ میرے لڑکپن کا پیار تھا وہ شخص