عذاب کیسا یہ اترا ہے آسمانوں سے

عذاب کیسا یہ اترا ہے آسمانوں سے

زمیں پہ خون کی بارش ہوئی مکانوں سے

یہی ہوا ہے کہ پھر لوٹ کر نہیں آئے

طیور شب کو جو نکلے تھے آشیانوں سے

بصیرتوں نے اثر سے خبر کو پہچانا

یہ کشتیاں بہت آگے ہیں بادبانوں سے

وہی ہے ان سے مرا بعد و قرب کا رشتہ

زمیں کا جیسے تعلق ہے آسمانوں سے

اسی لئے تو یہ سر اب کہیں نہیں جھکتا

جبین شوق ہے مایوس آستانوں سے

کوئی نظام بدلنا دلیل فتح نہیں

یہ سانپ بھی تو ہٹائے کوئی خزانوں سے

مرا خلوص بھی مشکوک پیار بھی جھوٹا

جو آئنے نہ تراشوں میں ان چٹانوں سے