ازل ہی سے نہ تھا تقدیر میں جب شادماں ہونا

ازل ہی سے نہ تھا تقدیر میں جب شادماں ہونا

عبث ہے شکوہ سنج ظلم و جور آسماں ہونا

ستم ہے سامنے آنکھوں کے ویراں آشیاں ہونا

جو کچھ چاہے کرے مجبور بیکس ناتواں ہونا

کسی سے مہر کی باتیں کرے کس طرح وہ بد خو

سکھایا ہی نہیں فطرت نے اس کو مہرباں ہونا

سکوں بعد فنا کیا خاک ملتا کنج مرقد میں

ہماری خاک کو تھا گرد راہ کارواں ہونا

بہت آساں ہے واصفؔ اس طرح کی زمزمہ سنجی

مگر ہے بلبل سدرہ کا مشکل ہم زباں ہونا