azal se bas yahi aalam hai kya kiya jae

azal se bas yahī 'ālam hai kyā kiyā jaa.e

kabhī ḳhushī hai kabhī ġham hai kyā kiyā jaa.e

adab se jhuk ke ye kahtā hai āsmāñ goyā

zamīñ ke sāmne sar ḳham hai kyā kiyā jaa.e

hayāt-o-maut kī vaadī kā fāsla yaaro

har ek saañs pe kuchh kam hai kyā kiyā jaa.e

qarīb aa ke vo mā'sūmiyat se kahte haiñ

marīz-e-'ishq lab-e-dam hai kyā kiyā jaa.e

nashāt-o-aish ke lamhe tumheñ mubārak hoñ

mujhe 'azīz shab-e-ġham hai kyā kiyā jaa.e

maiñ apne Dhang se jiine kā kyoñ huā 'aadī

zamāna is liye barham hai kyā kiyā jaa.e

taḳhayyulāt kī in sard vādiyoñ meñ 'sahar'

ridā-e-fikr-o-nazar kam hai kyā kiyā jaa.e

azal se bas yahi 'alam hai kya kiya jae

kabhi KHushi hai kabhi gham hai kya kiya jae

adab se jhuk ke ye kahta hai aasman goya

zamin ke samne sar KHam hai kya kiya jae

hayat-o-maut ki wadi ka fasla yaro

har ek sans pe kuchh kam hai kya kiya jae

qarib aa ke wo ma'sumiyat se kahte hain

mariz-e-'ishq lab-e-dam hai kya kiya jae

nashat-o-aish ke lamhe tumhein mubarak hon

mujhe 'aziz shab-e-gham hai kya kiya jae

main apne Dhang se jine ka kyon hua 'adi

zamana is liye barham hai kya kiya jae

taKHayyulat ki in sard wadiyon mein 'sahar'

rida-e-fikr-o-nazar kam hai kya kiya jae