ازل سے جس سے رہے سارے بد گماں پتھر

ازل سے جس سے رہے سارے بد گماں پتھر

ہوئے ہیں اب اسی شیشے کے پاسباں پتھر

ہوا جو گل تو فراموش کر دیا اس کو

چراغ سا کبھی روشن تھا خاکداں پتھر

تراش کر جسے انمول کر دیا اس نے

سناتا ہے اسی تیشے کی داستاں پتھر

زمیں پہ اس کو نہ رکھنے کی شرط ٹھہری تھی

اٹھا نہ پایا کبھی رکھ دیا جہاں پتھر

طلوع ہوگا وہ اک روز میرے اندر سے

افق سے تا بہ افق ہے جو ضو فشاں پتھر

لہو سے تر تھا بدن پر گلہ نہ ہم نے کیا

یہی سبب کہ ہوئے مجھ سے بد گماں پتھر

جبین سادہ کو ساحلؔ جو اس نے دیکھ لیا

اسی گھڑی سے ہوا مجھ پہ مہرباں پتھر