azal se jis se rahe sare bad-guman patthar

azal se jis se rahe saare bad-gumāñ patthar

hue haiñ ab usī shīshe ke pāsbāñ patthar

huā jo gul to farāmosh kar diyā us ko

charāġh sā kabhī raushan thā ḳhāk-dāñ patthar

tarāsh kar jise anmol kar diyā us ne

sunātā hai usī teshe kī dāstāñ patthar

zamīñ pe us ko na rakhne kī shart Thahrī thī

uThā na paayā kabhī rakh diyā jahāñ patthar

tulūa hogā vo ik roz mere andar se

ufuq se tā-ba-ufuq hai jo zau-fishāñ patthar

lahū se tar thā badan par gila na ham ne kiyā

yahī sabab ki hue mujh se bad-gumāñ patthar

jabīn-e-sāda ko 'sāhil' jo us ne dekh liyā

usī ghaḌī se huā mujh pe mehrbāñ patthar

azal se jis se rahe sare bad-guman patthar

hue hain ab usi shishe ke pasban patthar

hua jo gul to faramosh kar diya us ko

charagh sa kabhi raushan tha KHak-dan patthar

tarash kar jise anmol kar diya us ne

sunata hai usi teshe ki dastan patthar

zamin pe us ko na rakhne ki shart Thahri thi

uTha na paya kabhi rakh diya jahan patthar

tulua hoga wo ek roz mere andar se

ufuq se ta-ba-ufuq hai jo zau-fishan patthar

lahu se tar tha badan par gila na hum ne kiya

yahi sabab ki hue mujh se bad-guman patthar

jabin-e-sada ko 'sahil' jo us ne dekh liya

usi ghaDi se hua mujh pe mehrban patthar