ازل تا حال مقید سی اک حیات میں ہوں

ازل تا حال مقید سی اک حیات میں ہوں

سزا بطور کسی اور کائنات میں ہوں

مرے طبیب مجھے ہچکیوں کا نسخہ دے

بھرم رہے میں کسی کے تصورات میں ہوں

کوئی نہیں تھا تو خود سے سوال وصل کیا

جواب آیا معافی حصار ذات میں ہوں

سر وجود کوئی کربلا مسلط ہے

شدید پیاس ہے اور وادیٔ فرات میں ہوں

ترا بھی کوئی تجھے چھوڑ کے چلا جائے

میں کچھ دنوں سے اسی خواہش نشاط میں ہوں

بشیر بدرؔ پڑھو گے تو میں ملوں گا تمہیں

اداسی نام سے حضرت کی کلیات میں ہوں