aziz itna tera rang-o-bu lage hai mujhe

aziiz itnā tirā rañg-o-bū lage hai mujhe

koī qarīb se guzre to tū lage hai mujhe

safar ḳhayāl kā maiñ kis tarah tamām karūñ

tirī har ek adā chār-sū lage hai mujhe

zarūr koī ajab shai hai tujh meñ poshīda

ki terā zikr bhī ab kū-ba-kū lage hai mujhe

maiñ āsmān kī jānib bhī dekhtā huuñ magar

jo merā chāñd hai vo ḳhūb-rū lage hai mujhe

maiñ apnī zaat meñ tujh ko talāsh kartā huuñ

bahut hī sahl tirī justujū lage hai mujhe

hai ye bhī ek fusūn-e-nigāh ai 'rizvān'

nahīñ vo paas magar rū-ba-rū lage hai mujhe

aziz itna tera rang-o-bu lage hai mujhe

koi qarib se guzre to tu lage hai mujhe

safar KHayal ka main kis tarah tamam karun

teri har ek ada chaar-su lage hai mujhe

zarur koi ajab shai hai tujh mein poshida

ki tera zikr bhi ab ku-ba-ku lage hai mujhe

main aasman ki jaanib bhi dekhta hun magar

jo mera chand hai wo KHub-ru lage hai mujhe

main apni zat mein tujh ko talash karta hun

bahut hi sahl teri justuju lage hai mujhe

hai ye bhi ek fusun-e-nigah ai 'rizwan'

nahin wo pas magar ru-ba-ru lage hai mujhe